قوم يا شعب اصحى و فوق
قوم انتفض على حال بيسوء
قلنا زمان الثورة دى هوجة
بس دى كانت صحوة شوق
..................................
شوق للأمل للحرية
لعيشة كريمة و لقمة هنية
لشوية ميه نضيفة نشربها
لحلم بتعليم مية المية
................................
حلم لشاب بحريته
فى وظيفته يكبر و نشوف همته
عاوز يكبر عاوز يعلى
من غير ابن الباشا ما يثبته
...............................
فى مكانه و ياخد ترقيته
يسرق حلمه و يمشى فى سكته
و يطلع فوق كتافه يسرقه
و يبقى حلمه تحت الرجلين أخرته
..............................
امتى هاتصحى يا شعب و توعى
تقوم تتمرد ع اللى بيسعى
لسرقة أرضك و تاريخك
قبل مايجى اليوم و تبقى
.............................
من غير أرض من غير وطن
و تبقى زى عصفور اتسجن
جوه عشه فوق شجرته
قاعد وبس بيبكى بشجن
..............................
قوم يا شعب اتحرك ثور
اوعى تكون زى العصفور
راضى و خانع و بيستسلم
لحال ما يعجب على مر عصور
..............................
حارب الشر و حارب السطوة
ارجع تانى و قوم بالثورة
بس المرة دى تاخد بالك
اوعى تفرط فيها بالمرة
.............................
عاوزين مصر عزيزة قوية
على أعداءها صعيبة أبية
باحلم فيها بجنان خضرا
بمصنع ينتج و ايد بتبنى
حضارة عظيمة شامخة قوية
.............................
جودى يا مصر بخيرك علينا
ده انتى وطنا اللى بيحمينا
مش هانفرط فيكى يا غالية
و راح نشيلك جوه عنينا
يا ضى عنينا
روعه تسلم ايدك دعاء يارب احفظ مصر وشعبها وحميها يارب
ردحذفشكرا كتير ليك اللهم احفظ مصر و دائما بلد الأمن و الأمان
حذف